දකුණු ආසියාවේ උරුමය, දැනුම පදනම් කරගත් ආර්ථිකයයි
10 0

Posted by  in Latest News

* ඇමති චම්පික ආචාර්ය අබ්දුල් කලාම් හමුවේ.

* ආචාර්ය අබ්දුල් කලාම්ගේ ප්‍රධානත්වයෙන් “දැනුම පදනම් කරගත් ආර්ථිකයක් සදහා වූ බලශක්ති ප්‍රවේශය”
දෙදින ජාත්‍යන්තර වැඩමුළුව මේ මස අගදී.

ඉන්දියාව, ශ්‍රී ලංකාව වැනි ඉතා දීර්ඝ ශිෂ්ඨාචාරමය ඉතිහාසයක් ඇති දකුණු ආසියානු රටවලට දැනුම පදනම් කරගත් ආර්ථිකය ඓතිහාසික උරුමයක් බව ඉන්දියාවේ හිටපු ජනාධිපති හා ශ්‍රේෂ්ඨ විද්වතෙකු වන ආචාර්ය අබ්දුල් කලාම් මැතිතුමා පසුගිය ජූනි 08 වැනිදා ප්‍රකාශ කළේය. එතුමා මේ බව ප්‍රකාශ කළේ ශ්‍රී ලංකාවේ විදුලිබල හා බලශක්ති අමාත්‍ය පාඨලී චම්පික රණවක මහතා, ඒ මහතාගේ දිල්ලි නිල නිවසේදී හමුවූ අවස්ථාවේදීය. එළැඹෙන ජූනි 26-27 දෙදින තුළ කොළඹ දී පැවැත්වීමට නියමිත “දැනුම පදනම් කරගත් ආර්ථිකයක් සඳහා වූ බලශක්ති ප්‍රවේශය“ නම් වූ ජාත්‍යන්තර වැඩමුළුවේ මුඛ්‍ය දේශනය සඳහා ආචාර්ය අබ්දුල් කලාම් මැතිතුමාට නිල වශයෙන් ආරාධනා කිරීමට විදුලිබල හා බලශක්ති අමාත්‍යවරයා එතුමාගේ නිල නිවසේදී හමුවූ අවස්ථාවේදී මේ බව ප්‍රකාශ කෙරිණි. එහිදී තවදුරටත් අදහස් දැකුවූ හිටපු ඉන්දීය ජනාධිපතිතුමා,

“ලෝකය සිය තාක්ෂණික දියුණුවේ එක්තරා කඩඉමකට දැන් පැමිණ ඇත. තෙල්, ගල්අඟුරු, ගෑස් දහනය නිසා ඉතා බරපතල පාරිසරික ප්‍රතිඵල මතුවී ඇත. මේවාට විද්‍යාත්මක විසඳුම් සෙවීම මෙන්ම සමාජ විසඳුම් සෙවීමද අද මිනිස් සමාජයේ ප්‍රබල මෙන්ම මූලික අවශ්‍යතාවයක් වී තිබේ. ජල විභවය, සුළං බලය හා සූර්ය ශක්තිය විකල්ප බලශක්තීන් ලෙස යොදාගත යුතුය. ඒ සඳහා සමස්ථ සමාජය සූදානම් කිරීමද සිදුවිය යුතුය. එහෙයින් තමා ඉතා සතුටින් ශ්‍රී ලංකාවේ පැවැත්වෙන බලශක්ති සමුළුවට සහභාගීවන බව“ හිටපු ඉන්දීය ජනාධිපති අබ්දුල් කලාම් මැතිතුමා පැවසීය.

මේ අතර අදහස් දැක්වූ අමාත්‍ය පාඨලී චම්පික රණවක මහතා ප්‍රකාශ කළේ “මේ සියවස තුළම මානවයා විසින් සිය සංවර්ධන උපායමාර්ගය වෙනස් කරගත යුතු බවය. නැත්නම් එය ඔවුන්ගේ ශිෂ්ඨාචාරය පමණක් නොව, ජීවමය අවසානයද විය හැකි බවය. පරිසර හිතකාමී දර්ශනයන් බිහිකළ දකුණු ආසියානු සම්ප්‍රදායෙන් අනාගතය සඳහා උගත හැකි පාඩම් රැසක් ඇති බවත් බුදුසමය, හින්දු සමය, ජෛන සමය ආදී ආගම් රැසකින් ඇතිකළ පරිසර හිතකාමී දැනුම් පද්ධති නැවත නවීකරණය කර යොදාගත යුතු කාලය එළඹ ඇති බවත්, ආචාර්ය අබ්දුල් කලාම් වැනි ශ්‍රේෂ්ඨ විද්වතෙකුගේ ශ්‍රී ලංකා ගමන ඒ සඳහා ඉමහත් පිටිවහලක් වනු ඇති බවත්“ ඒ මහතා ප්‍රකාශ කළේය.